القائمة الرئيسية

الصفحات

كرونيك اروى و سامي باللهجة الجزائرية



كرونيك اروى و سامي باللهجة الجزائرية 

كرونيك اروى و سامي باللهجة الجزائرية

قصص كرونيك جزائرية

كرونيك جزائرية كرونيك اروى وسامي 

لتحميل PDF او للقراءة مباشرة من التدوينة
تحميل الكرونيك اضغط على هذه الصورة 

 كرونيك اروى و سامي باللهجة الجزائرية


كرونيك اروى و سامي باللهجة الجزائرية
يمكنكم تحميل الكرونيك PDF كرونيك جزائرية كرونيك كاملة 
كرونيك اروى و سامي باللهجة الجزائرية 

او القراءة هنا مباشرة

حكاية جديدة ويوم جديد
ليقراها مينساش يخلي الاثر نتاعو

ناضت صباح كي العادة على صوت يماها الحنين تفيق فيها..
الام: يا الخفاشة نوضي ليوم نهارك الاول فالقراية نوضي توجدي روحك تضربي ساعة مع ديك المراية
أروى: اافف ماماتي نزيد شوية و نوض و الله 5 دقايق و نوض نوجد روحي بلخف ما تخافيش نهار اللول ما يحاسبوناش عليه اون بلوس شكون يحاسب زلة كيما بنتك يجي يهدر نسكتو بغمزة
الام : نوضي يا موح الليالي نوضي توخضت فيك لازمني نجري عليك يا كلبة نوضي و لا و الله غير البيدون تع الما راهو يسنى
اروى : لالا خلاص العجوز ما تقلقيش راتي نضت
ناضت اروى دخلت دارت دوش خفيف طلقت شعرها لي يوصل حتى لخصرها مع لي هو شباب و شاتان واش نحكيلكم دارت غيسيل لدوك الشفارتين لكبار لي زادو بهاولها عينيها الخضورة زادت دارت غوجلاvغ لداك الفم الصغير لي يشوفو يدوب لبست سروال سليم ابيض و شوميز فالازرق كلاغ زادت لبست صندالة دارت صاك عمرت روحها ريحة تشمها من موزمبيق و خرجت جات هابطة فالدروج و يماها شافتها حلت فمها و قاتلها
الام: واش درتي لفيڨورتك راكي رايحة للعرس روحي اغسلي عليا داك التابلو تاع بيكاسو رايحة تقراي و لا ديري ستاج تاع حفافة
اروى: ااوو ماما كبرت عندي باك ما رانيش صغرونتك رورو باش خليني نمكيج و نلبس راه عامي اللخر ( اروى عايشة غير هيا و يماها باباها متوفي و عندها ختها كملت قرايتها فكندا و عايشة تما و يمات اروى تخليها تعمل لي تحب و دير واش تحب باسكو تحبها بزاف و ما ترفضلها حتى طلب لكن هاديك واش تحب عندها حدود و اروى قد الثقة لي دايرتها فيها يماها ) نوليو لحكايتنا يماها ما لقات ما تقول لصغرونتها ايا خرجت اروى رايحة لليسي و اللي جوز عليه يرميلها كلمة اكيييد ماكاش واحد ما يقدرش يشوف زينها و ما يهدرش اما هيا كانت فعالم واحوخر مبلاصيا الكيتمان و تسمع ماهيش كامل هنا تمشي و تغني (توحشتك انا عمري بغيت نشوووفك طال صبري طالت عليا غيييبتك اللي بغيتيها نديرلك انا بخاااطرك يا عمري يا عمري....خلاص ما تحلالكمش) .. لحقت لليسي دخلت تلاقات بصحاباتها سلمت عليهم فرحت لقات صاحبتها الانتيم طاحت معاها فالكلاصة يعني اكييد عام يجوز هبال خاصة مع اللي مخبيتهولهم ليام...
قراو الساعة اللولة انجليزية قراو حتى 11 جات قاتلهم المراقبة ما عندكمش استاد رياضيات اخرجو ..
راحت اروى للدار دخلت جوزت نهارها كي العادة ماكلة كونيكسيون هدرت مع ختها شوية فالسكايب و رقدت جازت 15 يوم و هي هكا حتى جات ليهم المراقبة بالخميس قالتلهم نهار الاحد تدخلو على 8 ماشي 10 جابولكم استاد رياضيات و عندكم 2 سوايع اللولين معاه ...
يا درا واش حيصرا نهار الاحد يوم جديد و بداية جديدة على ابطالنا

لحق الاحد لبست اروى سروال باج و شوميز vاغ مغ بابي vاغ طلقت شعرها و دارت صاك و خرجت تووووب راحت لليسي ناشطة على غير العادة لحقت لباب الليسي جبدت ريحة مالصاك و عمرت روحها من راسها لرجليها ههه (علابالي كاين لي يديرها) و دخلت ديراكت الكلاصة كان مازال ما جا حتى واحد دخلت هيا اللولة دارت كيتمان و تسمع و تغني... نوليو للباركينغ تاع الليسي دخلت لامبورڨيني و الليسي كامل دار يشوف حبط منها سامي حل الباب و ياااااا قلبي الصغير لا يتحمل ذلك المنظر لابس سروال ابيض و تريكو ابيض و فاست كلاسيك باج و طرابور باج كان مع الكور ديالو و لا يبان مرسوم شعرو لي يدي فيه الريح و سموريتو اللي دوبت كامل البنات واش نحكي واش نخلي بلاصا النواظر و هبط غلق الطونوبيل و ما حلب حتى واحد الليسي كامل يخزر فيه و هو يمشي بكل ثقة رايح لمكتب المدير ... المهم صونات دخلو كامل للاقسام نروحو لكلاصة اروى كانت الكلاصة كامل تحكي على هاداك الشباب تاع موقبيل و اروى مسكينة ماشي كامل سامعة دايرة كيتمان و ماشي فاهمة واش صاري حتى دخلت المراقبة و دخل موراها سامي قعدو كامل و البنات كامل يكحلو اروى كانت مهبطة راسها و دايرة الكيت قاتلهم المراقبة : نقدملكم الاستاذ سامي..... استاذ الرياضيات اللي راح يقريكم هاد العام  التلاميد: مرحبا بيك استاد  شافت المراقبة اروى مهبطة راسها و ما شافتش الكيت لي كان مغطيه شعرها قاتلها . المراقبة : انسة اروى... ممكن طلعي راسك و تقيمينا شوية ما شي وقت حشامتك دوكا(ههه واش بيها هادي اروى تحشم هههه) سامي كي سمع المراقبة تهدر حاب يعرف شكون هادي لي حشمت حتى تقول السلام ايا قعد يشوف فيها و هي مهبطة راسها يعني ما شافهاش كامل التلاميذ كامل دارو لاروى و هي ما سمعتهاش كانت تغني حتى نقزتها صحبتها قاتلها المراقبة راهي تهدر معاك اروى نحات الكيتمان بالزربة جيها قعدت فودنها و جيهة طاحت ناضت بلخف طلعت راسها ما فهمت والو لقاتهم كامل يخزرو شافت في سامي و قالت : اووو ماي ڨود سنيوة بقلاوة تمشي ههه الكلاصة كامل ضحكت و سامي تبسم على جنب يعني ما اتيراتوش بزاف و المراقبة قاتلها : انسة اروى هات الكيتمان هنا غير مسموح هنا  اروى: لالا استادة نمدلك التيليفون و ما نمدلكش الكيت هادا شريتو مالدلالة صاكريفيت باش شريتو و انا نطبع فالغاشي هاكي التيليفون خير  المراقبة ضحكت و قاتلها مهبولة ليوم جازت غدوة ما جوزش ماشي تقولي نلعبهالها بزوج كلمات ( هاد المراقبة تعرف اروى ملي كانت تقرى سنة اولى ثانوي يعني تحبها ماشي من هادوك المسمومين ) راحت المراقبة و قعد سامي فبلاصتو و اروى تبع فيه بعينيها و البنات كامل يكحلو قالهم سامي : ليوم حصة تعارف و راكو تعرفتو عليا دوك انا نتعرف بيكم جازت ساعتو هكداك و هوما كانو فرحانين كي هو حيقريهم اما اروى كانت تكحل غير مالتحت لتحت و كي يخزر فيها تشنف و دور راسها زعما طايحة خشينة..
خلاصت ساعتو و راح هو لقاعة الاساتدة تعرف عليهم و لقا استاد تاريخ و جغرافيا قدو فالعمر يعني تفاهمو و لاو يڨصرو جازو اليامات و ماكان حتى تطور غير انو اروى عالعام تكحل تع صون سمير و سامي دارو ليام حتى لحق يوم 100 jour على الباك و كاين لي يحتافلو بيه هاد ليوم يلبسو الكلاسيك و يدربو الحطة و يدخلو بالزغاريت ... ايا بسمانة قبل هاد نهار المراقبة جازت على كامل الاقسام قاتلهم هاد العام الليسي حاب يدير حفلة بمناسبة بقاء 100 يوم على شهادة الباكالوريا ايا و لاو كامل يوجدو لداك النهار و اروى طيح و تنوض واش تلبس كيفاش دير خخخ دارت كامل الحوانت شرات كامل اللبسات و ما فادها شيء لحق اليوم الموعود اروى لبست غوب نواغ ميني ستيل كلاسيك و لبست طالون و زادت دارت لشعرها بابيليز و ماكييات ولات كي العدرة و مع لاطاي ديالها و لات تهبل راحت عند صحبتها و عيطو لواحد يقرا معاهم و هو امي تاعهم باش يديهم لليسي  في دار سامي (عايش وحدو دارهم يسكنو بعاد عليه و ما حبش يعيش معاهم باسكو ماشي متفاهم معاه قالو اقرى ادارة اعمال باش يشد شركات تع باباه و هو ما حبش) المهم لبس كوستيك كحل و بابيون بوغدو و ستيكا شعرو و دار الريحة خرج توووب توب ركب كونوبيلتو و راح لليسي ملي هبط و خوما لبنات لاصقين فيه يا استاد راك شباب يا استاد خرج عليك الكوستيم خخخ (الحفلة داروها فالليسي كبيرة و حطو طوابل و الماكلة و اش نحكيلكم تبان عرس ماشي حفلة زغاريت الغنا... المهم نوليو لاروى جا حمزة امي تاعهم داها هي و صحبتها آسيا بالطونوبيل احقو للباركينغ تاع االيسي و هبطو لحقو لمكان الحفل و اروى ناضت تزغرت كي السردوك كامل دارو يشوفو كامل حلو فمهم في اروى و في زينها و فالروبة لي كانت مبينتلها اا طاي تاعها و ما ننساوش صحبتها هي تان كانت تهبل لبنات يكحلو على حمزة لي كان مبيش و اللولاد يكحلو على اروى و اسيا فهداك الوقت كان سامي و استاد تاريخ و ج قاعدين حالين فمهم في اروى ما فاهمين والو حتى نطق استاد ت/ج : يا محيناااك الله يبارك صارووخ نتراهن بكل املاكي مع اي واحد يقدر يطيحها فيه و يتزوج بيها في 6 اشهر بصح بومبة كيما هادي ماترداش بالقليل لازملها حبة مالمفقودين هههخ سامي: علاش واش راك تشوف فيها صح شابة بصح ماشي لهاد الدرجة يعني ما تلحقش وين ترهن كلش على جال مراهقة طيح فالاول لي حا فطريقها  استاد ت/ج: ههه لي يسمعك يقول قادر تتزوج بيها غدوة لوكان حبيت  سامي : علاش عندك شك فقدراتي لعزيز استاد: ههه راك تڨصر علابالي ما ديرهاش  سامي : ههه و لوكان نديرها واش تمدلي استاد: و الله لوكان تتزوج بيها في شهر و طيحها فيك المدة لي بقات نمدلك الطونوبيل اللخرة لي شريتها انت تأمر و انا نفد لكن بشرط سامي: واش هوا ازرع ينبت استاد: ههه ما توشيهاش بعد 6 اشهر طلقها و نزوجها انا  سامي: علاه تعيي فيا اتزوجها ديراكت علاه اللعب هدا استاد: لالا نتا لي واثق من روحك و حبيت نشوف عرض كتافك لكن اتقيد بهاد الشرط سامي : هههه ما لا وجدلي الطونوبيل نديها و علا شهر معروض لعرسي و علا 6 اشهر معروض لحفل طلاقي هههه استاد :هههه متفاهمين بصح بلعقل على انوشة كيفها . سامي دار قعد يتبع فيها بعينيه ما عجبوش الحال كي شاف حمزة يتبع فيها من بلاصة لبلاصة قال فقلبو: و الله شابة بصح ماشي قد شيراز( هادي مادامتو راهي مسافرة مي مزالو معاها و يحبها بصح هيا بنت ليل و حاشة على الكلمة) المهم بدا سامي يخمم كفاش يبدى الخطة ايا راح قدام اروى و قالها : الطالبة ديالي ليوم قريب ما فرقتش بينها و بين القمر  اروى ما فهمت والو وشبيها هادا جامي حكا معاها هكا جاوباتو :عيشك استاد بصح ماشي قدك الكوستيم واتاك بزاف سامي :عيشك ،واش ديري دوك ماي جيتي و نتي تجري ما حكمتيش بلاصة واش كاين  اروى : ماكان والو استاد غير نحب نعاون برك  سامي : اامم قمرة و حنينة تاني  اروى قاتلو يعيشك و مشات استغربت بصح فرحت بزاااف و هو قال في قلبو واقيل مرڨتها شوية الطفلة جامي هدرت معاها و كي هدرت دخلتلها. فالقمر و الحنانة كان خاص غير نقولها الكواكب نحركهم على جالك ياخي جايح .... عدات الحفلة و الغد منداك ما يقراوش ويكاند ايا جاز الويكاند خرجت مع ماماها شراو و حوسو راحو لدار خالتهاباتو لتم و بالاحد وصلها وليد خالتها هو تان بقلاوة بصح ماشي كيما سامي المفيد هي لحقت قالها وليد خالتها امين : كشرودة امبعد نجوز نديك  اروى قاتلو ايه و هبطت شافها سامي هابطة مالطونوبيل و زاد شاف امين قال في قلبو فاش دخلت روحك يا سامي على كبرك تتزوج بفرخة يوصلها واحد صباح و يديها لوخر عشيا
دخل يقري و ملي دخل. و هو يشارشيلها و هي بسلامتها لسانها طويل عليها حتى جالها برا خرجت تسب فيه و تعاير حتى صونات جا امين عيطلها باش تخرج و فهداك الوقت سامي و داك الاستاد كانو خارجين يفطرو شافوها ركبت مع امين هاداك الاستاد قالو: واش حبيبي لحمامة طارت وقيل  سامي : ههه لوكان طير يتكسرو جناحتها ما تخممش نت وجد الطونوبيل و اسنا الباقي ضحكو و كل واحد طلع طونوبيلتو بصح سامي دور الطونوبيل و راح يتبع في امين حتى لحقو للدار ڨارا بعيد و قعد يشوف دخلو و زاد شوية خرجت اروى و يماها ركبو مع امين و هو يشوف مالبعيد زاد تبعهم حتى لحقو ادار اروى هبطو كامل و دخلو و سامي قال فقلبو واش حيجيك من فرخة كيفها باين على لبستها واش تسوا ببفف انا لي عليا نربح الرهان و خلاص علاش نكسر فراسي معاها 
.
راح لدارو و قعد يخمم كيفاش يدير ما لقا غير انو يروح و يهدر معا والديها هدا هو انسب حل باش يكسب الرهان ايا راح رقد و كي ناض صباح راح لليسي ما قراش اروى ليوم فنص النهار راح لدارهم طبطب خرجتلو يماها قاتلو : انعم اتفضل وليدي باش نقدر نفيدك  سامي :هنا دار اروى..... الام : ايه انعم انا يماها بنتي راهي تقرا خير واش دارت واش كاين سامي : لا خالتي ما دارت والو انا جيت قاصد الحلال برك الام: اتفضل وليدي نحكو لداخل جوز تريح دخل و قعد يشوف فالدار عجباتو حس فيها بالحنانة لي تحرم منها  سامي : ممكن نكلم الاب ديالها هادو امورو لازم يتهدرو مع الاب الام: الاب متوفي و لي بغيتها اهدرها معايا انا ليها الاب و لام  المهم هدر مع يماها و كدب عليها بزاف حكايا قالها انا بنتك ظن نهار شفتها حبيتها و حبيت نقصد باب الدار ديرات و لوكان تقبلي نجي نخطبها و ما نطواوش و يكون العرس لازم قبل الباك باش ما تبقاش تخمم فيه  الام قاتلو لازم تشاورها و تردلو بالخبر بصح فهاداك الوقت دخلت اروى و اااوووب تصيب سامي مريح ما فهمت والو
اروى : ااوو واش كاين هنا واش صرا ماما ما تقوليليش برك هدا خويا كان مبحر  الام : ههههه يصفر وجهك يا وجه الكوكوطة هدا حاب يخطبك  سامي ميت بالضحك اروى: شكون ماما انا يخطبوني و ليمن لهادا ياك قولتيلي نزوجك ب موح بوخنونة علاه درتي عليا  الام : يااحاه نندب على تبهدايل ارواحي احكمي بلاصة هنا و اهدري معاه انا نوض ندير القهوة  ناضت الام و اروى دارت ليه اروى: وشبيك هبلت استاد واش مالخطبة واش راك دير هنا واش صرا واش كاين  سامي:بلعقل بلعقل ما كان والو عجبتيني قصدت باب الدار و لا حرام  اروى: ياو ربي يهديك واش يقولو علينا غالليسي واش حاب نتبهدل نت مهبول سامي :انت قولي ايه و الباقي عليا ما يهمكش علابالي بلي نعجبك انا ما نتقاومش و ناض و خلاها جات الام لقاتو راح  الام :واش قلتيلو يا الكسرونة علاه راح  اروى:ماعباليش ايمات الكسرونة خليني في بيتي ما تنوضينيش  سامي راح لدارو و علابالو بلي ما ترفضوش و هي طلعت لشمبرتها و قاعدة تتخيل فروحها معاه ما فهمتش ادا تقبل و لا لا حاسة بحاجة غريبة بزاف وعلاش ما بينلهاش ماللول بلي عاجباتو علاش هكا بين نهار و ليلة ببفف عشية كاملة ما خرجتش مالبيت لحق الليل هبطت تعشات و ولات رقدت غدوة منداك صباح جات تنوضها يماها ما حبتش تنوض قاتلها ما نروحش .. هو لحق لليسي الساعة اللولة فكلاصت اروى دخل لقا بلاصتها فارغة تبسم على جنب و قال و الله ربحت يا سامي الطفلة قابلة بلا ما تقول
جاز هاداك نهار كامل و اروى تخمم واش تقول و سامي كان بالو مهني علابالو بلي تقبل تبا لغروره هبطت اروى عند يماها  أروى : شوفي ماما انا ملي نشفا و زتوما تقولولو نزوجوك لبوخنونة كنت نفرح كي تقولوهالي بصح نهار لي حرڨ هاداك الكلب و ليت نسكر باللبن صح كنت صغيرة بصح دايرة فبالي بلي دار بوخنونة قريبة يعني ما نبعدش عليك بزاف بصح لبارح كي قولتيلي على هاداك السنيوة جا يخطب فرحت و ما فرحتش فرحت باسكو هو شباب و البنات كامل يغيرو و ما فرحتش باسكو نبعد عليك و انا ماي حليت عيني و انا قريبة ليك و دوك كيفاش حابتني نبعد عليك  ضربتها يماها على راسها و قاتلها : بركاي م الدراما ديالك هاد الفيلم شفناه كيف كيف نوضي نوضي اشري كاش حاجة غدوة يجو يخطبوك  اروى: بن عمييي ما كان حتا حنانة جيبي الدراهم نروح نشري جيبي نروح نشبع بقلاوة خير مالكروكي لي راني معاها  جابتلها يماها دراهم راحت شرات روب ميني فالنواغ بالدونتال مالفوق شابة تهبل مع صباط طالون شباب و فهاداك الوقت يماها كانت عيطت لسامي و قاتلو قابلين مرحبا بيككم راح سامي ليماها و قاللها فرحتلو بزاف قالها غدوة نروحو نخطبو زادت فرحتها بصح سامي جايو كلش نورمال راهو يشوف فيها رهان و بعد 6 اشهر يخلاص
لحق اليوم الموعود ناضت اروى فرحانة ماشي باسكو تحبو نونو باسكو شباب و تغير بنات خالاتها هههه المهم لبست و ستيكات و لات تهبل و هو لبس و حطط خرج توب تاني وصل سامي و امو و اختو لدار اروى (باباه ماجاش قتلكم ما يتفاهموش) دخلتهم يمات اروى و قصرو و عجبهم الحال حتى يمات سامي قاتلها :جيبيلنا العروسة نشوفوها  ناضت الام عيطتلها و هيا هابطا مالدروج و يمات سامي تصلي على النبي اووب و طاحت اروى فالدروج دارت ليماها قاتلها : العجوزة عينها قاسها يا جدك هدرتها ما كملتهاش انا طحت  الام : يا خاه على تبخدايل بلعي نوضي نوضي  سامس و اختو مرغين بالضحك عليها  ااامم سامي كي شافها قال فقلبو :دوماج جيتيني مجرد رهان  المهم قصرو و عجبتهم العروسة و سامي قال بلي مزروب عالعرس لازم قبل الباك ... المهم تفاهمو العرس على شهر ما حاش دير اروى عرس دير عشا برك بصح سامي قال ندير عرس كبير تعداو اليامات مالقراية للدار و سامي ما يعيطلها ما يهدر معاها فالليسي ما يحوس عليها و هي قالت ما نطيحش بنيفي و نروح نهدر معاه ايه و الليسي كامل سمع بلي حيتزوجو و سامي عرضهم كامل و الغيارات سياو يديرو مشاكل بيناتهم بصح ما قدروش هوما اصلا ما يتهادروش كيفاش يصراو مشاكل هيا داتو باش تغير البنات و هو داها باش يربح طونوبيل يعني واحد فيهم ما يحب التاني
تعداو ليام و لحق اليوم الموعود و علاقتهم فدوك ليام باردة جامي حكاو مع بعضاهم المهم نوليو لنهار اليوم هو يوم العرس دارت اروى عشا و حنا قلبتها بالشطيح على الدربوكة و هوما يحنيولها و هي تزغرت لروحها كامل ضحكو عليها المهم غدوة منداك صباح راحت للحفافة دارت كواف شابة و زادت دارت ماكياج و كترت مالغوج في فمها لبست بدرون و قعدت تزغرت هههه حتى سمعت الكلاكسون العرايس كي يلحقو لهاد المرحلة قلبهم يتزير ههه بصح هي خرجت راسها مالبالكون و تزغرت شبعو عليها ضحك حتى جات يماها دخلتها المهم جا سامي يخرجها عنقت يماها و طاحتلها دمعة مسحتها و قاتلها : الكسرونة راح تتوحش يماها بدات تبكي يماها امبعد خرجوها بالزغاريت البنات كامل يكحلو على سامي و هو حاس شغل عرس تاع صاحبو ما عبالوش كامل ما شافش كامل فوجها المهم طلعها فالطونوبيل و راحو للصال كانت كبيرة دخلها و صدرها و ريح قدامها زادت شوية و راحت بدلت ريحت شوية امبعد ديجي دارت راي ااه ربي و المريولة تاعنا ما تصبرش نحات الصباط و بدات تشطح هههه الصالة صلحتها و سامي مخلوع يشوف ما لقا يضحك ما لقا يبكي هو قاعد حتى لحقو ميساح : ما تنساش الشرط تاعزا لعزيز  كان فرحان خسرلو الفرحة مسكين
المهم لبست و شطحت و زغرتت و عيطت و جا وقت المرواح خرجت بلاغوب بلانش و هو بالكوستيم الله الله ركبها فالطونوبيل و داها لدارو دخل ديراكت للشمبرة و خلاها موراه اروى او وشبيه هادا دهلت و غلقت الباب دخلت للشمبرة لقاتو دخل يدوش قعدت شوية جبدت حوايج من فاليزتها سناتو حتا خرج كي خرج قالها : شمبرتك راهي لهيه ماشي هنا كملي قبالة تصيييها اروى: ااوو كنت تخليني فدارنا عندي شمبرتي علاش جايبني هنا و تخسر فالدراهم لهاداك لعرس باش تقولي شمبرتك لهيك مع كل احتراماتي بصح هادا وين ديكوفريت بلي نت زيرو فالمات صديقي  رفدت حوايجها و خرحت سامي ضرب على عقلو ما صابوش كان داير فبالو تبقى تبكي و تقولو علاش دير هكا و خسرتلي حياتي .... المهم راح موراها قالها واش هاد الهدرة واش راكي تخرفي  اروى: روح ما تعينيش جيبلي حاجة ناكولها راني مالفطور ما كليت والو  سامي: اسمعي ر... ما تهدريش معايا هكا هادي اللولة و اللخرة عمباتلك ديتك محبة فيك  اروى: هههه امشي وليظي تلعب بعيد و انا عمباتلك ديتك علي سواد عينيك  و غلقت الباب فوجهو هو تنارفا و راح لبيتو يخبط و يكسر و يقول :فرخة كيما هيا تقولي ها....ادا ما خلفتش دربتي انا طحان ... يعيط و يسب و هي تسمع ضحكت و راحت دوشت و دارت كيت و كونيكتات و رقدت غدوة الصباح ناضت بكري على تيليفو ماماها تعيط
قاتلها : تهنيتي اروى: ههه بيان سور اارقدة فبونك 2 بلاص و فالكنابي ماشي كيف كيف سي نورمال راني مهنيا  الام : يا الحطبة يا الكسرونة تهنيتي تهنيتي  اروى: ايهووه نبقى نعاود الحمد الله راني مهنية ماكلة و رقاد و بيع لبلاد  الام: يا رب صبرني على الحاطو لي راني نهدر معاه روحي الله يعطيك ضربة فالراس  اروى: صبحتي كي لعادة يعني تزوجت و دعاويك متالبيني روحي ماناتي بينوش حبكش باي  كوبات و ناضت تتكسل ليوم ويكاند ما تقراش دوشت و هبطت لقاتو فالكوزينة قاتلو: بونجوغ عريس الغفلة سامي: سكتينا يرحم باباك ماشي وقت تحراش تاعك ديجا نورمالمون تقادريني اروى: وي صح عمو عندك الح ق منا و رايح نقتلك غير بالقدر طونطون سامي : اللهم يا روح يا رب واش هاد الصباح
 
اروى: لالا ما عندها ما تزيد تطوال الروح تاعك هاكا راك مساعدني الشبيبة  سامي: اروى ما تخلينيش نبدا نخلط فالهدرة ديجا كولي و روحي تقراي لباك بقالو شهر كلات و راحت قرات كونيكتات و هدرت مع ختها فالسكايب ما قدرتش تحضر عرسها الله غالب جاز الويكاند ولات تقرا راحت صباح بكري لليسي و هو كان مازال ما ناضش ما يقريش صباح كي ناض ما لقاهاش قال:الحمد لله صبحت صباح كي الناس ستقهوى و بدل و راح لليسي راح لقاعة الاساتدة دخل لقا استاد ت/ج تع الرهان سامي: عسلامة سي شباب ودع طونوبيلتك اليوم  الاستاد : ههه الزواج تزوجت بصح الحب .مازال عليه 6 اشهر و الطونوبيل نهار تسينيي الورقة تع الطلاق نمدهالك ما تقلقش روحك  سامي: ههه مادام طيحتها فالزواج نطيحها فيا ما تقلقش روحك و خرج عندو ساعة مع كلاصة اروى دخل ما لقاهاش اوو هادي وين راحت زادت 5 دقايق جات هيا و حمزة يضحكو السخانة طلعتلو للراس  سامي: اييه لوكان زدتو شوية جيتو بكري و لا تحبو نجيبولكم كشما تشربو  اروى: اا اوكي استاد مالا رانا لتحتا نكملو فڨصرتنا ابعتلنا 2 اتاي الله يسترك  سامي خزر فيها خزر تع موت يبست فبلاصتها :ادخلو هدا الاندار اللول و يا مادام.. لخطرة الجاية ما تكتريش الهدرة ااخخ حشمت ما لقات ما تقول قراها و كي جا خارج قالها امبعد كي تكملي روحي اطلعي فالطونوبيل باش نروحو للدار و خرج و خلاها
لحقو للدار دخلت دوشت راحت زعمة الطيب هي طيااب زيييروو قاتلو تاكل هنا و لا برا قالها ناكل هنا. ادا ما تعرفيش خليني نخرج برا قاتلو نعر نعرف تاكل صباعتيك اسنا شوية برك طلع للشومبرة رقد شوية و هي راهي طيب ياك قلنا ما تعرفش قلات زوج بيضات دارت وحدة فطبسة و لخرة فطبست دارش شوية شلاظة فالكوتي و دارت شوية معدنوس ملفوق هههه و عيطتلو كي جا فدقالها سامي: ايه يا لالة واش درتينا عشا يا الطباخة الماهرة  دورتلو الطبسي قاتلو اروى: بيض علي الطريقة الهندة تشوكااااااااااااا راكو حاسين بيه هههه خرج يجري مالدار مسكين و هيا حطت داك الطبسة و داقت شوية  اروى: ببفف صح يخصو بزاف ملح بصح بنين ما يعرفش ياكل جايح
هو خرج برا كلا و شرالها بيتزا و كولما يتفكر يبدا يضحك امبعد قال: واش يا سامي جيت طيحها طيحاتك ببفف الله ينعلك يا ابليس  راح للدار دالها تاكل قاتو : انت ما تعرفش تاكل مخلي لي فيتامين فالدار و رايح لبرا تاكل فالخبز بالطوماطيش  سامي:يعني الماكلة لي درتيها فيتامين يا بنتي روحي راكي موخدة اروى: تعيي انا كليت و شبعت و انت اقعد تتبهلل نطلع نقرا و نرقد  طلعت قرات و رقدت جازو اليامات دايمن هبال و ضحك و خطرات مضاربة حتى لحق نهار الباك.
ناضت صباح وجها صفر مالخلعة مالڨري راهي واجدة مليح بصح لخوف فيها فيها داها لليسي لي جوز فيه و هو راح لليسي لي يعس فيه جوزت الساعة اللولة نورمال لحقو يجوزو انجليزية و مريولتكم حاطو فيها ايا قاعدة دو منا و منا لقاتهم كامل مبرونشيين خزرت فواحد كان يعس فيهم لقاتو يغمز عمبالها راهو يغمزلها ليها فهمتها بلي زعمة دوك انا نوريلك جازت الساعة اللولة ما جاش ليها زادت الدوزيام خزرت فية لقاتو يغمزلها زادت قالت نورمال زيدي اصبري دوك يوريلك مالصباح هو يغمز في باطل زادت جازت نص ساعة خزرت فيه لقاتو يغمز قالت او هادا راهو ناوي يوريلهم كامل لي يشوف فيه يغمزلو بقات النص ساعة اللخرة قعدت تبع فيه بعينيها حتى فهمت بلي هو مريض و عينو ترمش وحدها هههه ايخاااه مسكينة و لات تزرب تكتب واش جا فراسها تكتب و تسب فيه حتي خلاصت الساعة حطت الورقة و خرجت لقات اياد يسنا برا سقساها ادا خدمت سكتت سكتت امبعد حكاتلو واش صرالها شبع عليها ضحك و لا كل ما دور تخزر فيه يغمزلها زعما كيما هاداك الاستاد
كملت ياماتها تع الباك و ولات قاعدة فالدار هي و سامي وحد النهار جا ليها سامي قالها : عندي عرس صاحبي تحبي تروحي  أروى: وهادي فيها شك وين كاين الهول تصيبني  سامي: شوفي تروحي العرس ميكس يا ويلك و يا ويلك نلقاك تشطحي و لا ديري فالتباهديل  اروى: خلاص خلاص نروح نصفق معليش  راحت وجدت روحها لبست غوب غوج طويلة مفتوحة من ضهرها جاتها تهبل مع لا طاي ديالها و زادت دارت غوج في فهما ياتيري مالبعيد و طلقت شعرها لي غطالها الفتحة تاع لاغوب و راحت ركبت قبلو فالطونوبيل باش ما يقولش بدلي حوايجك
هو تاني ماشي قليل لبس كوستيم فالبلونوي خرجت عليه مع داك الكور و اللحية واش نحكيلكم المهم ركب قدامها و دار ليها شاف فمها  سامي: واش ر... معولا تروحيلي هكا قدام صحابي و النس ڨاع تشوف الروبا و ما فهمتش كيفاش حتى سترتي روحك و لبستيها طويلة ( هههه مازال ما شفت والو دوك تشوف السترة مليح ) اروى: اافف ياك رايحين للعرس ديجا واش دخلك طونطون نوغمالمون تحشم تهدر معايا هكا  سامي : بلعي ر .. و نحي عليا لخظاج و لا و الله ما كي متبعتني  نقصت شوية من فمها و ديماراو راحو للعرس كي لحقو كامل قعدو يشوفو فيها و هو كي هبط مشات موراه ما شافش ضهرها دخلو و جاو حيقعدو شدها من ضهرها زعما باش تريح حتى حس روحو يمس في لحمها دار باش يشوف لقاها تتبسم قالها : دوري  اروى: لالا حنريح علاش ندور نحشم انا حشامة بزاف  سامي: اروى قتلك دوري  اروى دارت بلعقل شاف ضهرها ما فهم والو شدها من يدهت و كركرها للطونوبيل تلاقا بصاحبو قالو وين هدا وين جيت قالو لعجوز عيانة عيطولي دوكا  دخلها فالطونوبيل و خبط الباب و يعيط واش راكي تشوفي فيا قدامك انا طحااان جيني هنا المعري كتر مالمغطي يا ر... اهدري واش ب... اهدري و هيا ساكتة زعما عاقلة ههه قالها: راني نهدر معااك اهدري رجعتيني رخيييس قدامهم  اروى: علاه راك تعيط يعني صاحبك ليمرتو كانت لابسة الميني ما حسش روحو رخيس و نت على شوية ضهر راك داير جناحتين  سامي: اناااا و هوااا ماشي كبف كببف و كي نهدر مع ر... ما تجاوبينيش فهمتي ما ترجعيليش الهدرة  اروى: نت عندك انفصام فالشخصية هادا وين قوتلي جاوبي اهدري و دوك تقولي ما تجاوبيش فهم روحك اىسي محمد  سامي : بلعي بلعي حسابي معاك مازال طويل  لحقو للدار طلعت لشومبرتها قالت انا ما حضرتش ما حضرتش عرس خلي نعرس في داري و خلاص  رفدت واحد الباطة تما و قعدت الطبل و تزغرت
دخل عليها لقاها تزغرت و تشطح راح دار يدو فجبينها عامباتلو طلعتلها الحما امبع شفها تغني قال : سور حكمها حمار الليل طفا الضو و جا خارج قاتلو : طونطون شعلو راني زهوانية حتى فالدار و محرمها عليا تاني ياخي حالة ياخي  شعل الضو و قالها نسمع حسك تباتي برا خليني نرقد  راح لبيتو و قعد يخمم فيها من اول يو م حتى هنا ما فهمش روحو علاش غار على لبستها علاش يديڨوتي كي ما يكونش معاها واش صرالك يا سامي فيق لعمرك بقاولك 3 اشهر و طلق  هي في بيتها تضحك وحدها على الجاست لي دارو ليوم راطا عرس كامل على جال روبا هههه ناضت صباح دارت الميناج و هو شرا ماكلة مالبرا كل ما يقولها طيبيلي تقولو نقليلك البيض  فطرو امبعد داها عند يماها توحشتها غير البوس و التعناق ريحت عشية كاملة عندها  امبعد ولات لدارها قالتلو : سامي نتفرجو فيلم  سامي : اافف اني عيان  اروى: خلاص تعيي دوك نشوف وحدي  سامي: خلاص وجدي دوك نجي نتفرج  دارت فيلم خلعة و قعدت هيا و ياه و هي تتفرج و تندب فحناكها على لي يموتو سامي : علاه تندب فروحك هكا اروى: ماكش تشوف كيفاش يموتو يا خويا نت ما تحسش سامي: سي نحس بصح ماشي نخبش روحي باش نحس بيهم  اروى لالا هادي عادة فيا مالي كنت صغيرة شدلها يديها وقعدو يخزرو فبعضاهم قالها : ماليوم العادة هادي تنحيها  اروى:ما نقدرش نتحكم فيديا سامي: يديك راهم عندي انا نتحكم فيهم  قعد سامي شاد يديها و هي كل دقيقة تخزر فيه عيات نعست رقدت على كتافو كمل لفيلم جا باش ينوضها قعد يخزر فيها و يبعدلها في شعرها دار يدو مور ضهرها و رقدت فوق صدرو  رقدو هكداك حتى للصبح فطنت هيا لقات روحها بين يديه قعدت تخزر فيه باستو من خدو و ناضت تجري راحت دوشت و راحت نوضاتو ناض فرحان هو تاني جاز يومهم نورمال بداو يحبو بعضاهم و سامي كل ما يقرب يخلاص 6 اشهر قلبو يتزير اما اروى خلاص عرفت روحها تحبو قررت انها تعتارفلو ما يهمهاش ردة فعلو المهم تريح قلبها  دخل سامي هاداك النهار مقلق كان هدر معاه هاداك الاستاد تاع الرهان دخل خبط الباب قاتلو بعقلك قالها واش دخلك داري ندير واش نحب ااروى: ايهيه كولني خير  سامي: ماتزيديليش همك نتي تاني مانيش فارغ شغل انا نهدر مع فرخة كيفك اروى: زعما انا قاتلة روحي عليك يا العتروس  سامي: اروى قلت خلاص خلاص ما نحبش الهدرة مورايا
دخلت لشمبرتها تكسر و تخبط و تعيط انا فرخخةةة واش يشوف فيا عتروس نكرهك نكرهههك سمع سامي العبدياط و الخبيط طلع يجري راح ليها فتح اليا لقا الحالة مڨلبا و هي فالارض و تبكي  سامي را يجري ليها عنقها و يقولها:وشبيك عمري خلاص راني هنا ما كان والو  اروى و هي تبكي: علاش دير هكا كنت حانقولك بلي الفرخة هادي تحبك علاش كرهت حياتي معاك ارحمني علابالك واش معنتها نكون مزوجة و انا ماشي حاسة بهاد زواج يكون عندي راجلي و كي نحوس عليه ما نلقاهش قدامي فهمني واش درتلك علاه تزوجتني كي ما تحبنيش علاه خسرتلي حياتي واش درتلك انا كنت بعيدة عليك خاطياتك مهنيا فحياتي علاش تزوجتني و خليتزي حبيتك علاش سامي ما قدرش يحمل كتر يحكي و يبكي حكالها منهار تفاهمو على الرهان حتى لليوم لي جا و فكرو فموعد الطلاق بعدت عليه و خزرت فيه قاتلو : يا خسارة انا نسوا طونوبيل و انا لي كونت دايراتك تسوا الدنيا كاملة هبطت راسها ليه و قاتلو : اروى ماليوم بببححح  خرجت مالدار تبكي و هو خرج موراها قاتلو ريح وين راك مانيش حابة تزيد طيح من عيني كتر راحت و خلاتو هي تبكي حتي لحقت لدارهم و هو كسر الدار كامل و يعيط المهم صباح جديد على ابطالنا اروى قررت انها تروح عند ختها لكندا كانت تجري على كوارطها و زاد خرجت الريزيلتا تاع الباك و ما جابتوش زادت هبلت و هو كيما سيا يهدر معاها مقدرش ما تخليهش سمع بلي رايحة لكندا رح عند يماها و قالها صح بدينها رهان بصح و الله و ربي عالم بلي نحبها ربي يعيشك حسي بيا و عاونيني
 
الام حن قلبها حتى هي تعرف بلي بنتها تحبو ما قدرتش تفرط فيها قاتلو نعاونك بصح اروى غدوة تروح لكندا قالها نتي اهدي معاها فالليل و حاولي قنعيها و الباقي عليا غدوة  دخلت الام لبيت اروى تحكي معاها  الام: يا بنتي معليش نريح معاك و نوليو كيما يامات زمان  اروى : يا ماما غير ياماتنا لي ما يتبدلوش ما نحس بالراحة غير عندك  الام: هه بنتي شفيتي نهار عيطتلك نهار تزوجتي و قتلك الا تهنيتي قلتيلي الرقدة فبونك 2 بلاص خير مالكانابي ههه ما توحشتيش داك البونك يا بنتي ما توحشتيش الماكلة و الرقاد كيما كنتي تقولي انعلي ابليس راهو شيطان دارها بيناتك هو غلط و انتي غلطتي ما تنسايش نتي تاني كي تزوجتي بيه ماش باسكو تحبيه تزوجتي باش تغيري بنات خالاتك هو تان كي يسمع يزعف نتي دوك وليتي تحبيها و هو داك بالرهان و ولا يحبك يعني ربي دار هاداك الرهان سبة باش تتلاقاو و هادا كامل مكتوب ربي  اروى: يا ماما علابالي و الله علابالي انا تان نحبو بصح هو مت سياش يرجعني جا خطرة و لا زوج و ما زادش حوس انا نروح نحوس عليه انعلي بليس ا ماما هو شاف حياتو و انا غدوة نشوف حياتي فبلاد وحدوخرا
ناضت صباح بدلت حوايجها رفدت فاليزاتها و خرجت هي و يماها رايحين للمطار لحقت هبطت هي و يماها دخلت للمطار
لقات الناس كامل يخزرولها
جا ليها البوليسي عطالها ورقة
مكتوب فيها :
«
اسف كسرونتي على كل دمعة نزلت من عينك بسببي »
تبسمت و مشات لقات ناس رافدين بولات حمورة وبيوضا
طرطقت وحدة لقات ورقة مكتوب فيها «آسف»
زادت طرطقت لوخرين مكتوب فيهم :
«
اضحكي ، تدللي ، اعدريني ،احببتكي و احبكي»
زادت مشات شوية لقاتو رافد نبولة اعطاهالها طرطقتها لقات مكتوب فيها : «كوني زوجتي من جديد»
 
هبط على ركبتو و قالها : أروى نحبك قابلة تكوني مرتي من اول و جديد  الدمعة طاحتلها و عنقاتو و لي فالمطار كامل يصفقو امبعد هيا ناضت تزغرت كي العادة ههه المهم تزوجو و جاو جاد و اياد و راهي سيرين فالطريق....
النهاية اسمحولي كي طولت عليكم 😘😘😘 اعطوني رايكم و يعطيكم الصحة😘😘😘 ومذابيكم تخلو تعليق +جام
وقولولي اذا احبو نزيدلكم حكايات هكا باللهجة الجزائرية
ونعمرو المكتبة الدزيرية
قوليلي هكا باه نعرف اي كو نحوس على دي كرونيك أخرين ولا نبطل
وهادا مكان
مرسي ليكم الي راكم تقراو و يعطيكم الصحة😻
Partage max
Fin.



 هذه بعض الكلمات التي تبحث عنها .

كرونيكات جزائرية تحميل,كرونيكات جزائرية قصيرة pdf,روايات باللهجة الجزائرية pdf,كرونيكات جزائرية تحميل,كرونيك pdf,كرونيك جزائرية,كرونيك,كرونيك قصيرة pdf,كرونيكات جزائرية تحميل,كرونيك احبني بعد الزواج,سكران بعينيك,كرونيك سكران بعينيك,كرونيك,كرونيك حب ,قصة حب بعد الزواج باللهجة الجزائرية,قصص جزائرية,كرونيك حب بعد الزواج,كرونيك حب بعد زواج,روايات باللهجة الجزائرية pdf ,كرونيك زواج قبل الحب,كرونيك جزائرية قصيرة,كرونيك, dz 
 كرونيك انت لي ,كرونيكات تونسية حب بعد الزواج



 

تعليقات

التنقل السريع